گرمیوں کی تعطیلات ختم، سندھ بھر میں اسکول اور کالج دوبارہ آباد

کراچی (مانیٹرنگ ڈیسک) کراچی سمیت سندھ بھر میں گرمیوں کی دو ماہ کی تعطیلات ختم ہونے کے بعد ہفتہ کے روز سرکاری و نجی اسکولوں اور کالجوں میں تدریسی سرگرمیوں کا باقاعدہ آغاز ہوگیا۔ یکم اگست سے نئے تعلیمی شیڈول کے تحت ہفتہ وار تعطیل بھی ختم کردی گئی ہے جس کے بعد صوبے بھر کے تمام تعلیمی ادارے اب ہفتے میں چھے روز کھلے رہیں گے۔ محکمہ تعلیم سندھ کی جانب سے جاری فیصلے کے مطابق یکم جون سے 31 جولائی تک جاری رہنے والی موسم گرما کی تعطیلات کے اختتام پر یکم اگست سے تمام سرکاری تعلیمی اداروں میں معمول کے مطابق تدریس شروع کردی گئی جبکہ نئے اوقاتِ کار پر بھی عملدرآمد کا آغاز ہوگیا ہے۔تعلیمی اداروں میں پہلے روز طلبہ کی حاضری معمول سے کم رہی تاہم اساتذہ نے بچوں کا پُرجوش استقبال کیا اور مختلف تعارفی، سائنسی اور ہم نصابی سرگرمیوں کے ذریعے انہیں دوبارہ تعلیمی ماحول سے ہم آہنگ کرنے کی کوشش کی۔ کئی اسکولوں میں طلبہ کے لیے خصوصی استقبالی پروگرام بھی منعقد کیے گئے۔ دوسری جانب بعض نجی تعلیمی اداروں نے انتظامی وجوہات کی بنا پر باقاعدہ تدریسی سرگرمیوں کا آغاز 3 اگست سے کرنے کا اعلان کیا ہے جبکہ والدین کو نئے ٹائم ٹیبل، کلاس شیڈول اور دیگر ضروری ہدایات واٹس ایپ، ای میل اور اسکول مینجمنٹ سسٹمز کے ذریعے ارسال کی گئیں۔ اسکولوں اور کالجوں کے دوبارہ کھلنے کے باعث کراچی سمیت دیگر بڑے شہروں کی سڑکوں پر صبح کے اوقات میں ٹریفک کا دباؤ بھی معمول کے مطابق بڑھ گیا۔ اسکول وینز، بسوں اور والدین کی بڑی تعداد بچوں کو تعلیمی اداروں تک پہنچانے کے لیے سڑکوں پر دکھائی دی، جس کے باعث اہم شاہراہوں پر معمول سے زیادہ رش دیکھنے میں آیا۔تعلیمی ماہرین کے مطابق طویل تعطیلات کے بعد تدریسی سرگرمیوں کی بحالی سے طلبہ کی تعلیمی رفتار دوبارہ معمول پر آئے گی، جبکہ والدین نے بھی امید ظاہر کی ہے کہ نئے تعلیمی سیشن میں بچوں کی پڑھائی مزید منظم انداز میں جاری رہے گی۔