ولیکا اسپتال میں 16 مزید بچوں میں ایچ آئی وی کی تصدیق
کراچی: کلثوم بائی ولیکا اسپتال میں مزید 16 بچوں میں ایچ آئی وی وائرس کی تشخیص ہوئی ہے جس کے بعد اسپتال کی انتظامی کارکردگی پر سنگین سوالات اٹھ کھڑے ہوئے ہیں۔ اس صورتحال پر صوبائی محتسب سندھ نے گہری تشویش اور سخت برہمی کا اظہار کیا ہے۔
صوبائی محتسب محمد سہیل راجپوت کی زیر صدارت منعقدہ اجلاس میں اسپتال کے امور کا جائزہ لیا گیا۔ بریفنگ کے دوران انکشاف ہوا کہ متاثرہ بچوں کی تعداد میں مسلسل اضافہ ہو رہا ہے اور مزید کیسز سامنے آنے کا قوی خدشہ بدستور موجود ہے جو انتہائی تشویشناک ہے۔
متاثرہ بچوں کے والدین نے اجلاس میں اسپتال انتظامیہ کے رویے، ادویات کی شدید قلت اور علاج کے اخراجات کی ادائیگی میں تاخیر سمیت متعدد شکایات پیش کیں۔ ان کا کہنا تھا کہ اسپتال کا غیر ذمہ دارانہ رویہ اور سہولیات کا فقدان بچوں کی زندگیوں کے لیے خطرہ ہے۔
محمد سہیل راجپوت نے کہا کہ اسپتال کے مالی معاملات بظاہر بچوں میں اس جان لیوا مرض کے پھیلاؤ کا باعث بنے ہیں۔ انہوں نے فوری طور پر 2 ہفتوں کے اندر معروف آڈٹ کمپنی کے ذریعے اسپتال کا مکمل مالی آڈٹ کروانے کا حکم صادر کیا ہے۔
انہوں نے اسپتال میں تربیت یافتہ عملے کی تعیناتی یقینی بنانے اور سندھ انفیکشیئس ڈیزیز اسپتال سے 6 ماہ کے لیے ماہر ڈاکٹرز کو ڈیپوٹیشن پر بلانے کی ہدایت کی۔ اس کے علاوہ ادویات اور غذائی سپلیمنٹس کی بلا تعطل فراہمی کو ہر صورت یقینی بنانے کا حکم دیا گیا ہے۔
صوبائی محتسب نے انتقال کر جانے والے بچوں کے لواحقین کو معاوضہ دینے، متاثرہ بچوں کی نفسیاتی بحالی کے لیے کام کرنے اور اسپتال میں فوری طور پر ایک ہیلپ ڈیسک قائم کرنے کی ہدایت جاری کی ہے۔ انہوں نے آگاہی مہم شروع کرنے پر بھی زور دیا ہے۔
حکام کو ہدایت کی گئی ہے کہ متاثرہ مزدور والدین کی بحالی کے لیے فوری اقدامات کیے جائیں۔ اس سنگین معاملے پر کیس کی مزید سماعت دو ہفتوں کے لیے ملتوی کر دی گئی ہے تاکہ اصلاحاتی اقدامات کی پیش رفت پر نظر رکھی جا سکے اور ذمہ داروں کا تعین ہو۔
