ہانگ کانگ جونیئر اسکواش اوپن، پاکستان کے عمیر عارف نے انڈر 17 ٹائٹل اپنے نام کر لیا
پاکستان کے ابھرتے ہوئے نوجوان اسکواش کھلاڑی عمیر عارف نے شاندار کارکردگی کا مظاہرہ کرتے ہوئے ہانگ کانگ جونیئر اسکواش اوپن کے انڈر 17 مقابلے کا ٹائٹل جیت لیا۔
ٹورنامنٹ کے فائنل میں عمیر عارف کا مقابلہ انگلینڈ کے لیوک میک برائیڈ سے ہوا، جہاں پاکستانی کھلاڑی نے سخت مقابلے کے بعد 3-2 سے کامیابی حاصل کرکے چیمپئن بننے کا اعزاز حاصل کیا۔
دونوں کھلاڑیوں کے درمیان فیصلہ کن معرکہ 5 کھیلوں تک جاری رہا۔ عمیر عارف نے ابتدائی کھیل 4-11 سے گنوایا، تاہم انہوں نے اگلے دونوں کھیلوں میں بھرپور واپسی کرتے ہوئے 11-6 اور 11-5 سے کامیابی حاصل کی۔
انگلش کھلاڑی نے چوتھے کھیل میں مقابلہ ایک مرتبہ پھر دلچسپ بناتے ہوئے 11-9 سے کامیابی حاصل کی، تاہم پانچویں اور فیصلہ کن کھیل میں عمیر عارف نے اپنی برتری ثابت کردی اور 11-4 سے فتح حاصل کرکے میچ 3-2 سے اپنے نام کرلیا۔
عمیر عارف کی اس کامیابی کو پاکستان کے جونیئر اسکواش کے لیے بھی اہم پیش رفت قرار دیا جا رہا ہے، کیونکہ نوجوان کھلاڑی نے بین الاقوامی سطح پر مضبوط حریفوں کے خلاف اپنی صلاحیتوں کا بھرپور مظاہرہ کیا ہے۔
عمیر عارف اس سے قبل عالمی جونیئر اسکواش چیمپئن شپ اور ایشیائی جونیئر اسکواش چیمپئن شپ میں بھی پاکستان کی نمائندگی کرچکے ہیں، جس سے بین الاقوامی مقابلوں میں ان کے تجربے کا اندازہ ہوتا ہے۔
نوجوان اسکواش کھلاڑی بِلکِس اینڈ عبدالرزاق داؤد فاؤنڈیشن کے فیلو بھی ہیں، جہاں انہیں کھیل کے میدان میں اپنی صلاحیتوں کو مزید نکھارنے کے لیے معاونت حاصل ہے۔
ہانگ کانگ جونیئر اسکواش اوپن کے انڈر 17 ٹائٹل کی فتح عمیر عارف کے کیریئر میں ایک اہم کامیابی قرار دی جارہی ہے، جبکہ ان کی حالیہ کارکردگی مستقبل میں پاکستان کے لیے مزید بین الاقوامی کامیابیوں کی امید بھی پیدا کرتی ہے۔
