کراچی میں آج مرطوب موسم، مطلع ابر آلود، بوندا باندی یا ہلکی بارش کا امکان
کراچی: محکمہ موسمیات نے شہر قائد کے لیے آج مرطوب موسم اور مطلع جزوی تا مکمل ابر آلود رہنے کی پیش گوئی کرتے ہوئے آئندہ چوبیس گھنٹوں کے دوران بوندا باندی یا ہلکی بارش کا امکان ظاہر کیا ہے۔
محکمہ موسمیات کے مطابق آج کراچی میں زیادہ سے زیادہ درجہ حرارت تینتیس سے پینتیس ڈگری سینٹی گریڈ کے درمیان رہنے کی توقع ہے جبکہ گزشتہ روز شہر کا زیادہ سے زیادہ درجہ حرارت تینتیس اعشاریہ چھ ڈگری سینٹی گریڈ ریکارڈ کیا گیا تھا۔
رپورٹ کے مطابق آج کراچی میں کم سے کم درجہ حرارت چھبیس ڈگری سینٹی گریڈ ریکارڈ ہوا جبکہ سمندر کی جانب سے چلنے والی ہوائیں موسم کو نسبتاً معتدل رکھنے میں مددگار ثابت ہوں گی۔
محکمہ موسمیات نے بتایا کہ آئندہ چوبیس گھنٹوں کے دوران دس سے چالیس کلو میٹر فی گھنٹہ کی رفتار سے سمندری ہوائیں چلنے کا امکان ہے، جس کے باعث شہر کے مختلف علاقوں میں بوندا باندی یا ہلکی بارش ہو سکتی ہے۔
اعداد و شمار کے مطابق آج صبح کراچی میں ہوا میں نمی کا تناسب پچاسی فیصد ریکارڈ کیا گیا، جبکہ آئندہ چوبیس گھنٹوں کے دوران نمی کا تناسب پچپن سے اسی فیصد کے درمیان رہنے کی توقع ہے۔
محکمہ موسمیات نے شہریوں کو مشورہ دیا ہے کہ موسم کی تازہ صورتحال سے باخبر رہیں اور ممکنہ بارش کے دوران غیر ضروری سفر سے گریز کریں۔
