سی ایس ایس 2026 کی امتحانی شیٹس سے متعلق اہم وضاحت

اسلام آباد: سی ایس ایس 2026 امتحانی شیٹس سے متعلق سوشل میڈیا پر گردش کرنے والی اطلاعات کو فیڈرل پبلک سروس کمیشن نے بے بنیاد قرار دے دیا ہے۔ ایف پی ایس سی نے واضح کیا ہے کہ امتحانی شیٹس گم ہونے یا امتحانی عمل میں بے ضابطگی سے متعلق دعوے حقائق کے منافی ہیں۔

ایف پی ایس سی کے مطابق سیکریسی ونگ اور ایگزامینیشن سیل میں بے ضابطگیوں کے حوالے سے سامنے آنے والی اطلاعات درست نہیں۔ امتحانی شیٹس کی وصولی، حفاظت اور ریکارڈ رکھنے کیلئے مکمل نظام موجود ہے اور امتحان کے ہر مرحلے پر شیٹس کا ریکارڈ محفوظ کیا جاتا ہے۔

امتحانی شیٹس کے ریکارڈ کا مکمل نظام موجود
کمیشن نے بتایا کہ امتحانی شیٹس کے گم ہونے، کسی شکایت یا بے ضابطگی کا کوئی ریکارڈ موجود نہیں۔ امتحانی مواد کی حفاظت کیلئے مقررہ طریقہ کار پر عمل کیا جاتا ہے تاکہ امتحانی عمل کی شفافیت برقرار رہے۔

ایف پی ایس سی نے یہ بھی واضح کیا کہ امتحانی عمل میں کسی اکیڈمی یا تیسرے فریق کی مداخلت کا کوئی امکان نہیں ہے۔

رول نمبر اور نشستوں کی تقسیم خودکار طریقے سے
اعلامیے کے مطابق سی ایس ایس امتحانات میں رول نمبر پلان اور نشستوں کی تقسیم خودکار نظام کے تحت کی جاتی ہے۔ اس طریقہ کار کا مقصد امتحانی عمل میں کسی بھی غیر ضروری مداخلت کے امکانات کو ختم کرنا اور امیدواروں کو یکساں مواقع فراہم کرنا ہے۔

کمیشن نے کہا ہے کہ امتحانات کے تمام مراحل میں میرٹ اور شفافیت کو یقینی بنایا جاتا ہے۔

امیدوار سرکاری ذرائع پر اعتماد کریں
ایف پی ایس سی نے سی ایس ایس امیدواروں کو ہدایت کی ہے کہ امتحانات سے متعلق کسی بھی خبر یا اطلاع کی تصدیق کیلئے صرف سرکاری ذرائع سے رجوع کریں اور سوشل میڈیا پر گردش کرنے والی غیر مصدقہ معلومات پر اعتماد نہ کریں۔

کمیشن نے خبردار کیا ہے کہ غلط معلومات پھیلانے والوں کے خلاف قانونی کارروائی کا حق محفوظ ہے۔

سی ایس ایس 2026 امتحانی شیٹس سے متعلق وضاحت کے بعد امیدواروں کو مشورہ دیا گیا ہے کہ وہ غیر مصدقہ دعوؤں سے پریشان ہونے کے بجائے ایف پی ایس سی کے سرکاری اعلانات کو ہی حتمی سمجھیں۔