اسرائیل کے غزہ پرتازہ حملوں میں 9 فلسطینی شہید ہوگئے
غزہ: غزہ کے مختلف علاقوں میں اسرائیلی ڈرون حملوں کے نتیجے میں کم از کم 9 فلسطینی شہید جبکہ تقریباً 40 زخمی ہوگئے۔
غیر ملکی خبر رساں ویب سائٹ کی رپورٹ کے مطابق اسرائیلی حملوں کا سلسلہ غزہ کے شمالی، وسطی اور جنوبی علاقوں تک پھیلا ہوا تھا، جہاں مختلف مقامات کو ڈرون حملوں کا نشانہ بنایا گیا۔
بین الاقوامی ذرائع ابلاغ کی رپورٹس کے مطابق غزہ سٹی کے متعدد علاقوں میں افراد، گاڑیوں اور لوگوں کے اجتماعات کو نشانہ بنائے جانے کی اطلاعات سامنے آئی ہیں، جس کے نتیجے میں جانی نقصان ہوا۔
عالمی میڈیا کی رپورٹس کے مطابق جنوبی غزہ کے علاقے خان یونس میں المواسی کے مقام پر بے گھر فلسطینیوں کے خیمے بھی حملوں کی زد میں آئے۔ فلسطینی ذرائع کے مطابق خیموں پر ہونے والی کارروائی کے نتیجے میں متعدد افراد جاں بحق جبکہ 20 سے زائد زخمی ہوئے۔
اسی دوران وسطی غزہ میں الزوایدہ کے قریب بھی ایک حملے کی اطلاع سامنے آئی، جہاں ایک شخص جاں بحق اور 8 افراد زخمی ہوگئے۔ زخمیوں کو طبی امداد کے لیے اسپتال منتقل کیے جانے کی اطلاعات ہیں۔
غزہ میں تازہ حملوں سے ایک روز قبل بھی بڑے پیمانے پر جانی نقصان ہوا تھا۔ غزہ سٹی کے الشاطی پناہ گزین کیمپ میں ایک رہائشی عمارت کو نشانہ بنایا گیا تھا، جس کے نتیجے میں 12 فلسطینی جاں بحق اور تقریباً 40 زخمی ہوئے تھے۔
فلسطینی ذرائع کے مطابق عمارت پر حملے کے بعد متعدد افراد لاپتا بھی ہوئے، جس کے باعث ہلاکتوں میں مزید اضافے کا خدشہ ظاہر کیا گیا تھا۔
غزہ میں مختلف علاقوں پر مسلسل حملوں کے باعث شہری آبادی کو جانی نقصان کے ساتھ رہائش اور بنیادی سہولیات سے متعلق مشکلات کا بھی سامنا ہے، جبکہ تازہ کارروائیوں میں بے گھر فلسطینیوں کے خیموں کو نشانہ بنائے جانے کی اطلاعات نے صورتحال کی سنگینی مزید بڑھا دی ہے۔
