امریکا میں دنیا کے بدصورت ترین کتے کے عالمی مقابلے کا دلچسپ فیصلہ
سانتا روزا: امریکی ریاست کیلیفورنیا میں منعقد ہونے والے عالمی مقابلے میں 6 سالہ کتے جنّی لو نے دنیا کے بدصورت ترین کتے کا اعزاز اپنے نام کر لیا ہے۔
میڈیا رپورٹس کے مطابق سونوما کاؤنٹی فیئر گراؤنڈز میں ہونے والے اس ایونٹ میں دنیا بھر سے شریک کتوں نے اپنی منفرد ظاہری خصوصیات پیش کیں۔
واضح رہے کہ جنّی لو گزشتہ سال بھی اسی مقابلے میں شرکت کر چکی تھی اور اس وقت وہ دوسرے نمبر پر رہی تھی، تاہم اس بار اس نے اپنی الگ تھلگ ظاہری بناوٹ اور انداز کے ذریعے دیگر تمام امیدواروں کو پیچھے چھوڑتے ہوئے یہ اعزاز اپنے نام کرنے میں کامیابی حاصل کی۔
یہ مقابلہ ہر سال انتہائی جوش و خروش سے منعقد کیا جاتا ہے جس کا بنیادی مقصد کتوں کی ظاہری انفرادیت کو اجاگر کرنا ہے۔ اس ایونٹ کے ذریعے عام لوگوں میں جانوروں کو گود لینے، انہیں ریسکیو کرنے اور ان کے ساتھ ہمدردی کا رویہ اپنانے کا اہم پیغام پہنچایا جاتا ہے۔
رواں برس اس عالمی ایونٹ کی 50 ویں سالگرہ بھی منائی گئی ہے۔ منتظمین نے کہا کہ گزشتہ 5 دہائیوں سے جاری یہ سلسلہ جانوروں کی انفرادیت کو قبول کرنے کی علامت بن چکا ہے۔ یہ مقابلہ ریسکیو کیے گئے جانوروں کے لیے محبت اور قبولیت کا ایک طاقتور ذریعہ ثابت ہو رہا ہے۔
جنّی لو کی کہانی اس مقابلے کو مزید جذباتی اور خاص بناتی ہے۔ اس کتے کو جنوبی کوریا میں گوشت کے غیر انسانی کاروبار سے ریسکیو کیا گیا تھا۔ بعد ازاں کیلیفورنیا کی دو مختلف ریسکیو تنظیموں نے اسے امریکا منتقل کیا تاکہ اسے ایک محفوظ گھر فراہم کر کے گود دیا جا سکے۔
اس مقابلے نے ثابت کیا کہ جانوروں کی ظاہری شکل و صورت سے قطع نظر، انہیں انسانوں کی محبت اور تحفظ کی سخت ضرورت ہوتی ہے۔ ریسکیو کیے گئے جانوروں کا اس طرح عالمی سطح پر پذیرائی حاصل کرنا جانوروں کے حقوق کے لیے کام کرنے والوں کی ایک بڑی کامیابی اور حوصلہ افزائی ہے۔
