غلط ای چالان آگیا؟ گھر بیٹھے شکایت درج کرانے کا آسان طریقہ سامنے آگیا
لاہور: غلط ای چالان کی شکایت کرنے والے شہریوں کے لیے اہم سہولت متعارف کرادی گئی ہے۔ اب لاہور میں اگر کسی شہری کو لگتا ہے کہ اس کا ای چالان غلط جاری ہوا ہے تو اسے ٹریفک پولیس کے دفتر جانے کی ضرورت نہیں، بلکہ آن لائن ریویو درخواست جمع کرائی جاسکتی ہے۔
لاہور ٹریفک پولیس کے مطابق متنازع ای چالان کو پنجاب سیف سٹیز اتھارٹی کے آن لائن ای چالان پورٹل کے ذریعے چیلنج کیا جاسکتا ہے۔ اس سہولت کا مقصد شہریوں کو گھر بیٹھے اپنے چالان پر اعتراض درج کرانے کا موقع دینا اور غیر ضروری دفتری چکروں سے بچانا ہے۔
غلط ای چالان کیسے چیلنج کریں؟
سب سے پہلے شہری پنجاب سیف سٹیز اتھارٹی کے سرکاری ای چالان پورٹل پر جائیں۔ وہاں مطلوبہ معلومات درج کرکے اپنا متعلقہ چالان تلاش کیا جاسکتا ہے۔
چالان سامنے آنے کے بعد اس میں موجود تمام تفصیلات کو اچھی طرح چیک کریں۔ اگر شہری کو یقین ہو کہ چالان غلط جاری کیا گیا ہے تو اسے ’’Review‘‘ کے آپشن پر کلک کرنا ہوگا۔
اس کے بعد پورٹل پر مانگی گئی معلومات فراہم کرکے ریویو کی درخواست آن لائن جمع کرائی جاسکتی ہے۔ درخواست جمع ہونے کے بعد متعلقہ حکام شکایت اور متنازع چالان کا جائزہ لیں گے۔
جائزے کا عمل مکمل ہونے کے بعد درخواست گزار کو فیصلے سے آگاہ کیا جائے گا۔ اس طرح شہری کو معمولی نوعیت کے معاملے کے لیے ٹریفک پولیس کے دفتر کے چکر نہیں لگانے پڑیں گے۔
آن لائن درخواست جمع کرانے میں کسی قسم کی مشکل پیش آئے تو شہری لاہور ٹریفک پولیس کی ہیلپ لائن 0322-5638888 پر رابطہ کرکے رہنمائی حاصل کرسکتے ہیں۔
لاہور میں ٹریفک قوانین کی نگرانی کے لیے ڈیجیٹل نظام کے استعمال میں اضافے کے ساتھ ای چالان بھی شہریوں کے لیے اہم معاملہ بن چکے ہیں۔ ایسے میں آن لائن ریویو کی سہولت شہریوں کو غلط یا متنازع چالان کے خلاف اپنا مؤقف متعلقہ حکام تک پہنچانے کا آسان راستہ فراہم کرتی ہے۔
شہریوں کو چاہیے کہ چالان موصول ہونے کی صورت میں اس کی تفصیلات ضرور چیک کریں اور اگر کوئی غلطی نظر آئے تو مقررہ آن لائن طریقہ کار کے ذریعے بروقت اعتراض درج کرائیں۔
