بیرون ملک سے موبائل فون لانے والے پاکستانیوں کےلیے اہم خبر

اسلام آباد: بیرون ملک سے موبائل فون پاکستان لانے والے شہریوں کے لیے اہم پیش رفت سامنے آگئی ہے۔ درآمد شدہ موبائل فونز پر ٹیکس کے معاملے کا سینیٹ کی قائمہ کمیٹی برائے کابینہ سیکریٹریٹ نے جائزہ لیتے ہوئے ٹیکس میں فوری کمی کی سفارش کردی ہے۔

رانا محمود الحسن کی زیر صدارت سینیٹ کی قائمہ کمیٹی برائے کابینہ سیکریٹریٹ کا اجلاس ہوا، جس میں درآمد شدہ موبائل فونز کی قیمتوں کے تعین اور ان پر عائد ٹیکس کے طریقہ کار پر تفصیلی غور کیا گیا۔

اجلاس کے دوران کمیٹی ارکان نے موبائل فونز پر موجودہ ٹیکسز اور قیمتوں کے حوالے سے متعلقہ حکام سے بریفنگ لی۔ کمیٹی نے کسٹمز حکام کو ہدایت کی کہ درآمد شدہ موبائل فونز پر عائد ٹیکسوں کے لیے مؤثر اور واضح طریقہ کار وضع کیا جائے۔

قائمہ کمیٹی نے ایف بی آر اور ٹیرف کمیشن سے بھی موبائل فونز پر عائد ٹیکس کے حوالے سے رپورٹ طلب کرلی ہے، تاکہ موجودہ نظام اور ٹیکس کے اثرات کا جائزہ لیا جاسکے۔

کمیٹی کی جانب سے درآمد شدہ موبائل فونز پر ٹیکس فوری طور پر کم کرنے کی سفارش بھی کی گئی ہے۔ اگر اس حوالے سے عملی اقدام کیا جاتا ہے تو بیرون ملک سے فون لانے والے پاکستانیوں سمیت مقامی مارکیٹ میں موبائل خریدنے والے صارفین کو بھی فائدہ پہنچنے کی توقع ہے۔

اجلاس میں ایف بی آر حکام نے مؤقف اختیار کیا کہ ٹیکس لگانے یا ختم کرنے کا اختیار پارلیمنٹ کے پاس ہے۔ حکام کے مطابق کسی بھی ٹیکس میں بنیادی تبدیلی کے لیے متعلقہ قانونی اور پارلیمانی طریقہ کار اختیار کرنا ضروری ہوگا۔

دوسری جانب پاکستان ٹیلی کمیونیکیشن اتھارٹی کے حکام نے کمیٹی کو بتایا کہ ملک میں اس وقت 35 کمپنیاں اسمارٹ فونز تیار کررہی ہیں۔

موبائل فونز پر ٹیکس کا معاملہ طویل عرصے سے صارفین کی توجہ کا مرکز رہا ہے، بالخصوص بیرون ملک سے مہنگے فون پاکستان لانے والے افراد کو ٹیکس اور ڈیوٹی کی مد میں زیادہ رقم ادا کرنا پڑتی ہے۔

سینیٹ کمیٹی کی سفارش کے بعد اب ایف بی آر اور ٹیرف کمیشن کی جانب سے رپورٹ اور متعلقہ حکام کی آئندہ کارروائی اہم ہوگی۔ تاہم حتمی ٹیکس کمی یا تبدیلی کا فیصلہ متعلقہ قانونی اور پارلیمانی عمل مکمل ہونے کے بعد ہی سامنے آئے گا۔