ایران نے بات چیت کی خواہش ظاہر کی، ہم مذاکرات کے لیے تیار ہیں: مارکو روبیو
امریکی وزیر خارجہ مارکو روبیو نے کہا ہے کہ امریکا ایران کے ساتھ مذاکرات کے لیے آمادہ ہے، تاہم کسی بھی پیش رفت کے لیے کیے گئے وعدوں اور ذمہ داریوں کی پاسداری بنیادی شرط ہوگی۔
اپنے بیان میں امریکی وزیر خارجہ مارکو روبیو نے کہا کہ موجودہ کشیدگی کے تناظر میں ایرانی حکام نے امریکا سے رابطہ کیا ہے اور مذاکرات میں دلچسپی کا اظہار کیا ہے، جس کے بعد سفارتی کوششوں کے امکانات پیدا ہوئے ہیں۔
انہوں نے آبنائے ہرمز میں تجارتی بحری جہازوں کو نشانہ بنائے جانے کے واقعات پر تشویش کا اظہار کرتے ہوئے کہا کہ ایسے اقدامات عالمی تجارت اور خطے کے استحکام کے لیے خطرہ ہیں۔
امریکی وزیر خارجہ کا کہنا تھا کہ امریکا کسی بھی ملک کو اہم سمندری راستوں اور بین الاقوامی آبی گزرگاہوں پر بالادستی قائم کرنے کی اجازت نہیں دے گا۔
انہوں نے کہا کہ عالمی بحری راستوں پر آزادانہ آمدورفت کا تحفظ امریکا کی مستقل پالیسی ہے اور اس حق کے دفاع کے لیے کوششیں جاری رہیں گی۔
مارکو روبیو نے مزید کہا کہ واشنگٹن سفارتی راستہ اختیار کرنے کا حامی ہے، تاہم کسی بھی مذاکراتی عمل کی کامیابی کے لیے تمام فریقوں کو اپنی ذمہ داریوں اور وعدوں پر مکمل عمل درآمد یقینی بنانا ہوگا۔
