عراقی وزیراعظم کا دورۂ سعودی عرب مؤخر
بغداد: عراق کے وزیراعظم علی فالح الزیدی نے ملک میں حالیہ مہلک حملوں اور بگڑتی ہوئی سیکیورٹی صورتحال کے پیش نظر اپنا طے شدہ دورۂ سعودی عرب مؤخر کر دیا ہے۔
بین الاقوامی میڈیا رپورٹس کے مطابق وزیراعظم علی فالح الزیدی جمعرات کو سعودی عرب کے سرکاری دورے پر روانہ ہونے والے تھے، جہاں دونوں ممالک کے درمیان مختلف شعبوں میں تعاون سے متعلق متعدد مفاہمتی یادداشتوں (ایم او یوز) پر دستخط متوقع تھے۔
رپورٹس کے مطابق اس دورے کے دوران عراق اور سعودی عرب کے درمیان سیکیورٹی تعاون، دوطرفہ تعلقات، اقتصادی شراکت داری اور خطے کی تازہ صورتحال پر بھی اہم مذاکرات ہونے تھے۔
عراق میں ہونے والے فضائی حملوں کے بعد صورتحال تبدیل ہوگئی، ان حملوں، جنہیں امریکا اور سعودی عرب سے منسوب کیا جا رہا ہے، میں کم از کم 20 عراقی جنگجو ہلاک ہوئے، جس کے بعد بغداد میں سیکیورٹی خدشات میں اضافہ ہوا۔
حکومتی ذرائع کا کہنا ہے کہ انہی حالات کے باعث وزیراعظم نے دورہ مؤخر کرنے کا فیصلہ کیا تاکہ وہ ملک کی داخلی سیکیورٹی صورتحال کا جائزہ لے سکیں اور متعلقہ اداروں کے ساتھ مشاورت جاری رکھ سکیں۔
تاحال عراقی حکومت نے دورے کی نئی تاریخ کا اعلان نہیں کیا جبکہ سعودی عرب کی جانب سے بھی اس حوالے سے کوئی باضابطہ بیان جاری نہیں کیا گیا۔
