کراچی میں اغوا برائے تاوان میں ملوث گروہ گرفتار، 4 مغوی بازیاب

کراچی: تھانہ گلبہار پولیس نے کارروائی کرتے ہوئے غیر ملکی شہریوں سمیت 4 افراد کو اغوا کرکے قید رکھنے والے 3 رکنی گروہ کو گرفتار کرلیا، جبکہ گلبہار نمبر 2 میں ایک مکان پر چھاپہ مار کر 3 نائجیرین شہریوں اور ضلع خیبر سے تعلق رکھنے والے ایک شخص کو بحفاظت بازیاب کرالیا گیا۔

 نجی ٹی وی کی رپورٹ کے مطابق پولیس کا کہنا ہے کہ کارروائی خفیہ اطلاع اور جدید تفتیشی ذرائع سے حاصل ہونے والی معلومات کی بنیاد پر کی گئی۔ پولیس ٹیم نے گلبہار نمبر 2 میں واقع ایک مکان کو گھیرے میں لے کر چھاپہ مارا، جہاں چاروں مغویوں کو مکان کے نچلے حصے میں غیر قانونی طور پر قید رکھا گیا تھا۔

رپورٹ کے مطابق بازیاب ہونے والوں میں 3 نائجیرین شہری اور ضلع خیبر کا ایک رہائشی شامل ہے۔ پولیس نے نائجیرین شہریوں کی شناخت اسٹن ولد نوان کواب، مائیکل ولد اسٹن اور جنتن ولد اسٹن کے نام سے کی ہے، جبکہ ضلع خیبر سے تعلق رکھنے والے مغوی کا نام نصرت خان ولد ارباب بتایا گیا ہے۔

پولیس حکام کے مطابق مغویوں کو لاہور سے پشاور منتقل کیا گیا تھا، جس کے بعد انہیں گلبہار تھانے کی حدود میں واقع مکان میں قید کردیا گیا۔ ملزمان نے مغویوں کی رہائی کے بدلے ان کے اہل خانہ سے بھاری رقم بطور تاوان طلب کی تھی۔

ابتدائی تفتیش میں انکشاف ہوا ہے کہ اغوا کار مغویوں کے ورثا سے 25 ہزار امریکی ڈالر تاوان کا مطالبہ کررہے تھے۔ پولیس نے واقعے کے مختلف پہلوؤں کی تحقیقات شروع کردی ہیں تاکہ یہ معلوم کیا جاسکے کہ اغوا کی واردات میں مزید کون سے افراد ملوث تھے اور مغویوں کو لاہور سے پشاور منتقل کرنے میں کس کس نے سہولت فراہم کی۔

کارروائی کے دوران پولیس نے واردات میں مبینہ طور پر ملوث تین ملزمان کو گرفتار کرلیا۔ گرفتار افراد کی شناخت آصف محمود ولد عباس، ساکن شاہین بازار، عمر فاروق اور عثمان غنی پسران عتیق احمد، ساکنان گلبہار کے طور پر ہوئی ہے۔

پولیس کے مطابق ابتدائی تفتیش کے دوران گرفتار ملزمان کے بین الاقوامی سطح پر منشیات کے کاروبار سے مبینہ تعلق کا بھی انکشاف ہوا ہے۔ ملزمان پر آئس سمیت دیگر منشیات کی خرید و فروخت میں ملوث ہونے کا شبہ ہے، جس کے حوالے سے مزید تحقیقات کی جارہی ہیں۔

پولیس نے گرفتار ملزمان کے قبضے سے ایک کلاشنکوف، 2 پستول، گولیاں، منشیات اور دیگر سامان بھی برآمد کرلیا ہے۔ برآمد ہونے والے اسلحے اور دیگر اشیا کو تفتیش کا حصہ بناتے ہوئے ملزمان سے مزید پوچھ گچھ کی جارہی ہے۔

حکام کا کہنا ہے کہ گرفتار ملزمان کے خلاف مقدمہ درج کرلیا گیا ہے اور اغوا کے اس نیٹ ورک سے متعلق مزید شواہد اکٹھے کیے جارہے ہیں۔ پولیس اس بات کا بھی سراغ لگارہی ہے کہ گروہ کے دیگر ممکنہ ارکان کون ہیں اور آیا اس گروہ کا مزید وارداتوں سے بھی کوئی تعلق ہے۔

پولیس کے مطابق بازیاب ہونے والے چاروں افراد کو بحفاظت تحویل میں لے کر ضروری قانونی کارروائی مکمل کی جارہی ہے، جبکہ گرفتار ملزمان سے جاری تفتیش کے دوران اغوا کی واردات کے پس پردہ محرکات اور گروہ کی دیگر سرگرمیوں سے متعلق مزید اہم معلومات سامنے آنے کی توقع ہے۔