کویت کا فضائی دفاع متحرک، مشتبہ ڈرونز روکنے کیلیے کارروائیاں جاری رہنے کا اعلان
کویت سٹی: حکومتِ کویت نے دعویٰ کیا ہے کہ اس کے فضائی دفاعی نظام نے مبینہ ایرانی ڈرون خطرے کا فوری جواب دیتے ہوئے متعدد کارروائیاں انجام دی ہیں۔
سرکاری ذرائع کے حوالے سے میڈیا رپورٹس کے مطابق دفاعی یونٹس مکمل طور پر متحرک ہیں اور فضائی حدود کے تحفظ کے لیے مسلسل نگرانی اور جوابی اقدامات جاری رکھے ہوئے ہیں تاکہ کسی بھی ممکنہ خطرے کو بروقت ناکام بنایا جا سکے۔
کویتی فوج کی جانب سے جاری بیان میں کہا گیا کہ ملک کا فضائی دفاع ہر وقت فعال ہے اور مشتبہ ڈرونز کو نشانہ بنانے کے لیے تمام ضروری وسائل بروئے کار لائے جا رہے ہیں۔
فوج کے مطابق حفاظتی اقدامات کا مقصد قومی سلامتی کو یقینی بنانا اور کسی بھی بیرونی خطرے کا فوری سدباب کرنا ہے۔
عسکری حکام نے بتایا کہ مختلف علاقوں میں سنائی دینے والے دھماکوں کی آوازیں کسی حادثے کا نتیجہ نہیں بلکہ فضائی دفاعی نظام کی کارروائیوں کے باعث آئیں۔ حملہ آور ڈرونز کو روکنے کے لیے دفاعی نظام نے بروقت ردعمل دیا، جس کے باعث شہریوں میں پھیلنے والی تشویش کی وضاحت ضروری سمجھی گئی۔
کویتی حکام نے عوام سے اپیل کی ہے کہ وہ غیر مصدقہ اطلاعات اور افواہوں پر یقین نہ کریں بلکہ صرف متعلقہ سرکاری اداروں کی جانب سے جاری ہونے والی معلومات پر انحصار کریں۔ اس سلسلے میں شہریوں کو ہدایت کی گئی ہے کہ وہ حفاظتی اقدامات پر عمل کریں اور کسی بھی ہنگامی صورتحال میں سرکاری رہنمائی کو ترجیح دیں۔
حکام نے تاحال مبینہ کارروائیوں کے دوران کسی جانی یا مالی نقصان کی تصدیق نہیں کی۔ اس حوالے سے مزید تفصیلات بھی فوری طور پر جاری نہیں کی گئیں، تاہم متعلقہ ادارے صورتحال پر مسلسل نظر رکھے ہوئے ہیں اور سیکیورٹی انتظامات کو مزید مؤثر بنانے کے لیے اقدامات جاری رکھنے کا اعلان کیا گیا ہے۔
