مالی سال کے آغاز پر پاکستان کی برآمدات میں نمایاں اضافہ ریکارڈ
اسلام آباد: وفاقی وزارت خزانہ نے مالی سال 2027 کے پہلے مہینے کے معاشی اعدادوشمار جاری کرتے ہوئے بتایا ہے کہ جولائی 2026 کے دوران پاکستان کی برآمدات میں نمایاں بہتری دیکھی گئی ہے۔
نجی ٹی وی کی رپورٹ کے مطابق ابتدائی اعدادوشمار میں بتایا گیا ہے کہ برآمدی شعبے کی بہتر کارکردگی سے معیشت کے لیے مثبت اشارے سامنے آئے ہیں۔
وزارت خزانہ کے مطابق جولائی میں ملکی برآمدات کا حجم 2.94 ارب امریکی ڈالر تک پہنچ گیا ہے۔ اسی عرصے میں سالانہ بنیاد پر برآمدات میں 9.5 فیصد جبکہ مجموعی طور پر 31 فیصد سے زیادہ اضافہ ریکارڈ کیا گیا، جسے مالی سال کے آغاز کے لیے حوصلہ افزا پیش رفت قرار دیا گیا۔
اُدھر درآمدات کے حوالے سے جاری رپورٹ میں بتایا گیا کہ جولائی کے دوران جون کے مقابلے میں درآمدات میں 0.2 فیصد کمی آئی ہے۔ اس کے نتیجے میں تجارتی خسارہ بھی 15 فیصد سے زائد کم ہوگیا، جو بیرونی تجارت کے توازن کے لیے مثبت پیش رفت سمجھی جا رہی ہے۔
وزارت خزانہ نے کہا ہے کہ برآمدی شعبے کی کارکردگی میں مسلسل بہتری کے آثار نمایاں ہو رہے ہیں۔ مزید یہ کہ موجودہ معاشی رجحانات سے ظاہر ہوتا ہے کہ برآمدات پر مبنی حکمت عملی کے ابتدائی نتائج سامنے آنا شروع ہوگئے ہیں۔
اعلامیے میں اس بات پر بھی زور دیا گیا کہ وفاقی بجٹ میں نجی شعبے اور برآمدات کے فروغ کے لیے متعارف کرائی گئی پالیسیوں کے اثرات اب آہستہ آہستہ ظاہر ہو رہے ہیں۔ حکام کا کہنا تھا کہ اگر یہی رفتار برقرار رہی تو آنے والے مہینوں میں بیرونی تجارت مزید مضبوط ہونے کی توقع ہے۔
وزارت خزانہ کے مطابق جولائی کے معاشی اشاریے مالی سال 2027 کے لیے ایک مثبت آغاز کی عکاسی کرتے ہیں۔ اسی بنیاد پر برآمدات میں مزید اضافے اور تجارتی خسارے میں کمی کے امکانات بھی روشن دکھائی دیتے ہیں۔
