اوپن اے آئی کا چیٹ جی پی ٹی کے مفت صارفین کیلئے بہت بڑا تحفہ
مصنوعی ذہانت کی معروف کمپنی اوپن اے آئی نے ChatGPT مفت صارفین کے لیے بڑی خوشخبری سناتے ہوئے اعلان کیا ہے کہ جلد ہی انہیں نئے GPT-5.6 Leona ماڈل تک رسائی فراہم کی جائے گی، جس کے ذریعے لامحدود چیٹ کی سہولت دستیاب ہوگی۔
رپورٹس کے مطابق اس وقت ChatGPT کے مفت اور Go سبسکرائبرز GPT-5.5 استعمال کر رہے ہیں، تاہم کمپنی نے اعلان کیا ہے کہ آئندہ اپ ڈیٹ کے بعد GPT-5.6 Leona ماڈل بھی ان صارفین کے لیے دستیاب ہوگا۔
اوپن اے آئی کا کہنا ہے کہ اس اپ ڈیٹ کا مقصد جدید مصنوعی ذہانت کی سہولیات زیادہ سے زیادہ صارفین تک پہنچانا اور ChatGPT کو مزید مؤثر بنانا ہے۔
کمپنی کے چیف ایگزیکٹو آفیسر سام آلٹمین کے مطابق نئی تبدیلیوں کے تحت چیٹ پر مبنی گفتگو کی حد ختم کر دی جائے گی، جس سے صارفین بغیر کسی مخصوص چیٹ حد کے اے آئی سے گفتگو جاری رکھ سکیں گے۔
اس کے ساتھ ہی اوپن اے آئی “تھنک” (Think) بٹن کو بھی دوبارہ متعارف کرا رہی ہے، جس کے ذریعے پیچیدہ سوالات کے زیادہ بہتر اور تفصیلی جوابات فراہم کیے جائیں گے۔
البتہ کمپنی نے واضح کیا ہے کہ تصاویر بنانے، فائل اپ لوڈ کرنے اور دیگر جدید فیچرز کے استعمال پر موجود حدود برقرار رہیں گی، جبکہ ان فیچرز میں بھی وقت کے ساتھ مزید بہتری لائی جائے گی۔
اوپن اے آئی کے مطابق GPT-5.6 Leona ماڈل اس وقت ChatGPT Plus اور Pro صارفین کے لیے دستیاب ہے، جبکہ مفت اور Go پلان استعمال کرنے والے صارفین کو بھی یہ اپ ڈیٹ مرحلہ وار فراہم کی جائے گی۔
ماہرین کے مطابق اس اقدام سے مصنوعی ذہانت کی جدید ٹیکنالوجی عام صارفین کے لیے پہلے سے زیادہ قابلِ رسائی ہو جائے گی اور روزمرہ کے کاموں، تعلیم، تحقیق اور تخلیقی سرگرمیوں میں ChatGPT کا استعمال مزید آسان ہوگا۔
