پاکستان نے تیسری بار سینٹرل ایشین مینز والی بال چیمپئن شپ اپنے نام کر لی
پاکستانی والی بال ٹیم نے سینٹرل ایشین مینز والی بال چیمپئن شپ میں شاندار کارکردگی کا مظاہرہ کرتے ہوئے مسلسل تیسری مرتبہ ٹائٹل اپنے نام کر لیا۔ قومی ٹیم نے فائنل میں بنگلہ دیش کو یکطرفہ مقابلے کے بعد 3-0 سے شکست دے کر ایک اور تاریخی کامیابی حاصل کی۔
فائنل میں پاکستان نے آغاز ہی سے کھیل پر مکمل گرفت برقرار رکھی۔ قومی ٹیم نے پہلا سیٹ 25-20، دوسرا 25-16 جبکہ تیسرا سیٹ بھی 25-20 سے جیت کر ٹرافی اپنے نام کی۔ اس کامیابی کے ساتھ پاکستان نے پورے ٹورنامنٹ میں ناقابلِ شکست رہنے کا اعزاز بھی حاصل کیا۔
سینٹرل ایشین مینز والی بال چیمپئن شپ کے دوران قومی کھلاڑیوں نے شاندار ٹیم ورک، مضبوط دفاع اور مؤثر حملوں کا مظاہرہ کیا، جس کی بدولت کسی بھی ٹیم کو پاکستان کے خلاف کامیابی حاصل نہ ہو سکی۔ ماہرین کے مطابق ٹیم کی مستقل مزاج کارکردگی مستقبل کے بین الاقوامی مقابلوں کے لیے بھی خوش آئند اشارہ ہے۔
دوسری جانب وزیراعظم شہباز شریف نے قومی والی بال ٹیم، کوچنگ اسٹاف اور مینجمنٹ کو تاریخی کامیابی پر مبارکباد پیش کی۔ انہوں نے کہا کہ قومی کھلاڑیوں نے بہترین کھیل اور نظم و ضبط کا مظاہرہ کرتے ہوئے پوری قوم کا سر فخر سے بلند کیا ہے۔
وزیراعظم کا کہنا تھا کہ پاکستان کے نوجوان کھیلوں کے مختلف میدانوں میں عالمی سطح پر ملک کا نام روشن کرنے کی بھرپور صلاحیت رکھتے ہیں۔ انہوں نے یقین دلایا کہ حکومت کھیلوں کے فروغ اور باصلاحیت نوجوان کھلاڑیوں کی سرپرستی جاری رکھے گی تاکہ پاکستان مزید بین الاقوامی اعزازات اپنے نام کر سکے۔
قومی ٹیم کی اس کامیابی پر شائقینِ کھیل نے بھی خوشی کا اظہار کرتے ہوئے کھلاڑیوں کو بھرپور خراجِ تحسین پیش کیا اور مستقبل میں مزید کامیابیوں کے لیے نیک خواہشات کا اظہار کیا۔
