دوسرے ٹیسٹ کا تیسرا دن: ویسٹ انڈیز نے 6 وکٹ پر 103 رنز بنالیے، پاکستان کیخلاف 60 رنز کی برتری حاصل

پورٹ آف اسپین: ویسٹ انڈیز نے پاکستان کے خلاف دو ٹیسٹ میچوں کی سیریز کے دوسرے اور آخری ٹیسٹ کے تیسرے روز اپنی دوسری اننگز میں 6 وکٹوں کے نقصان پر 103 رنز بنا لیے ہیں، جس کے ساتھ اسے پاکستان پر مجموعی طور پر 60 رنز کی برتری حاصل ہوگئی ہے۔

پاکستان نے ویسٹ انڈیز کی پہلی اننگز کے 344 رنز کے جواب میں 387 رنز بنا کر 43 رنز کی برتری حاصل کی۔

تیسرے روز پاکستان نے اپنی پہلی اننگز کا آغاز 266 رنز دو وکٹ پر کیا۔ کپتان بابر اعظم 88 رنز بنا کر رن آؤٹ ہوئے، جبکہ ڈیبیو کرنے والے اویس ظفر صرف ایک رن بنا سکے۔ سلمان علی آغا کھاتہ کھولے بغیر آؤٹ ہوئے اور محمد رضوان نے 18 رنز کی اننگز کھیلی۔

عبداللہ شفیق نے ساجد خان کے ساتھ اہم شراکت قائم کرتے ہوئے ٹیم کا مجموعہ 370 رنز تک پہنچایا۔ ساجد خان 30 رنز بنا کر آؤٹ ہوئے، علی عثمان 10 رنز بنا سکے، جبکہ عبید شاہ اور محمد علی بغیر کوئی رن بنائے پویلین لوٹ گئے۔ عبداللہ شفیق شاندار 160 رنز بنا کر ناٹ آؤٹ رہے۔

پاکستان کی پوری ٹیم 387 رنز پر آؤٹ ہوئی اور پہلی اننگز میں 43 رنز کی برتری حاصل کرنے میں کامیاب رہی۔

43 رنز کے خسارے کے ساتھ دوسری اننگز کا آغاز کرنے والی ویسٹ انڈیز کی ٹیم کو پاکستانی بولرز نے ابتدا ہی سے دباؤ میں رکھا۔ میزبان ٹیم کا ٹاپ آرڈر خاطر خواہ کارکردگی نہ دکھا سکا اور وقفے وقفے سے وکٹیں گنواتا رہا۔

تیسرے روز کا کھیل ختم ہونے تک ویسٹ انڈیز نے 6 وکٹوں کے نقصان پر 103 رنز بنا لیے تھے، جس کے باعث اسے پاکستان پر 60 رنز کی مجموعی برتری حاصل ہوگئی۔

ویسٹ انڈیز کی جانب سے کیوم ہوج 34 رنز کے ساتھ نمایاں رہے، جبکہ روسٹن چیز دن کی آخری گیند پر 17 رنز بنا کر آؤٹ ہوئے۔

پاکستان کی جانب سے دوسری اننگز میں ساجد خان نے عمدہ بولنگ کرتے ہوئے 4 وکٹیں حاصل کیں، جبکہ علی عثمان کے حصے میں 2 وکٹیں آئیں۔

واضح رہے کہ سیریز کے پہلے ٹیسٹ میں ویسٹ انڈیز نے پاکستان کو شکست دے کر دو میچوں کی سیریز میں 1-0 کی برتری حاصل کر رکھی ہے۔