آئی سی سی نے ورلڈ کپ 2027 کے لیے 12 وینیوز کا اعلان کر دیا
انٹرنیشنل کرکٹ کونسل نے ورلڈ کپ 2027 کے انعقاد کے لیے منتخب کیے گئے 12 میدانوں کا باضابطہ اعلان کر دیا ہے۔ عالمی مقابلے کی میزبانی اس بار جنوبی افریقا، زمبابوے اور نمیبیا مشترکہ طور پر کریں گے، جہاں دنیا کی بہترین کرکٹ ٹیمیں عالمی اعزاز کے لیے مدمقابل ہوں گی۔
آئی سی سی کی جانب سے جاری تفصیلات کے مطابق ٹورنامنٹ کے لیے جنوبی افریقا کے 8 میدانوں کا انتخاب کیا گیا ہے، جبکہ زمبابوے کے 3 میدان بھی میزبان فہرست میں شامل ہیں۔ اس کے علاوہ نمیبیا کے دارالحکومت ونڈہوک میں واقع ایک میدان کو بھی عالمی مقابلوں کی میزبانی کے لیے منتخب کیا گیا ہے۔
یہ عالمی کپ 50 اوورز کے فارمیٹ پر کھیلا جائے گا اور اس کی ایک خاص بات یہ بھی ہوگی کہ 24 برس بعد ایک مرتبہ پھر افریقی سرزمین کرکٹ کے اس سب سے بڑے میلے کی میزبانی کرے گی۔ اس سے قبل 2003 میں جنوبی افریقا، زمبابوے اور کینیا نے مشترکہ طور پر عالمی کپ کی میزبانی کی تھی۔
آئی سی سی نے یہ بھی اعلان کیا ہے کہ ورلڈ کپ 2027 میں مجموعی طور پر 14 ٹیمیں شرکت کریں گی۔ اس کے ساتھ ہی ایونٹ کے لیے 3 مرحلوں پر مشتمل نیا مقابلہ جاتی نظام بھی متعارف کرایا گیا ہے، جس کا مقصد عالمی کپ کو مزید دلچسپ، مسابقتی اور سنسنی خیز بنانا ہے۔
کرکٹ حلقوں کے مطابق میزبان ممالک، نئے مقابلہ جاتی نظام اور افریقی سرزمین پر عالمی کپ کی واپسی اس ایونٹ کو شائقین کے لیے غیر معمولی اہمیت کا حامل بنا دے گی، جبکہ دنیا بھر کے کرکٹ مداح اب اس بڑے ٹورنامنٹ کے آغاز کا بے صبری سے انتظار کر رہے ہیں۔
