ایران نے آبنائے ہرمز مکمل طور پر کھولنے کیلئے امریکا کو 6 شرائط پیش کر دیں

ایران نے آبنائے ہرمز مکمل طور پر کھولنے کے لیے امریکا کے سامنے 6 شرائط رکھ دیں

ایران نے آبنائے ہرمز کو مکمل طور پر کھولنے کے لیے امریکا کے سامنے چھ اہم شرائط پیش کردی ہیں۔ ایران کی قومی سلامتی کونسل کے سیکرٹری ذوالقدر کے مطابق، امریکا کو ایران کے ساتھ اپنے رویے میں بنیادی تبدیلی لانا ہوگی۔

ذوالقدر کی جانب سے جاری بیان میں کہا گیا ہے کہ ایران کو کسی بھی وقت اور کسی بھی زبان میں دھمکی نہ دی جائے اور ایرانی قوم کی توہین سے گریز کیا جائے۔ اس کے علاوہ ایران اور اس کے اتحادیوں کے خلاف جاری جنگ مستقل طور پر ختم کی جائے، ایران کی بحری ناکہ بندی ختم کی جائے اور ایرانی حدود کے اطراف موجود امریکی افواج کو واپس بلایا جائے۔

ایرانی حکام نے مزید مطالبہ کیا ہے کہ جنگ کے دوران ایران کو پہنچنے والے نقصانات کا مکمل اور بلاکمی و کاست ازالہ کیا جائے، جبکہ ایران پر عائد تمام غیرمنصفانہ اور غیرقانونی پابندیاں ختم کی جائیں۔ ایران کے منجمد اور ضبط شدہ اثاثے بھی بغیر کسی شرط کے فوری طور پر بحال کرنے کا مطالبہ کیا گیا ہے۔

سیکرٹری قومی سلامتی کونسل نے خبردار کیا کہ اگر امریکا نے اپنا رویہ تبدیل نہ کیا تو آبنائے ہرمز دوبارہ نہیں کھولی جائے گی۔ ان کے مطابق ایران جنگ ہو یا مذاکرات، اپنے طے شدہ مؤقف اور ارادوں سے پیچھے نہیں ہٹے گا۔

دوسری جانب ایرانی وزیر خارجہ عباس عراقچی نے اس سے قبل کہا تھا کہ آبنائے ہرمز میں عارضی بحری راستے کے قیام کے حوالے سے عمان کے ساتھ معاہدہ تقریباً طے پا چکا ہے۔ ان کے مطابق ایرانی مسلح افواج نے ہرمز میں ایک نیا بحری راستہ بھی تیار کرلیا ہے، تاہم اس کا یہ مطلب نہیں کہ آبنائے ہرمز مکمل طور پر دوبارہ کھول دی گئی ہے۔ اس کا فیصلہ دیگر عوامل کو مدنظر رکھتے ہوئے کیا جائے گا۔