جعلی ای چالان پیغامات سے شہری ہوشیار، اسلام آباد پولیس کا انتباہ

اسلام آباد: جعلی ای چالان پیغامات کے ذریعے آن لائن فراڈ کی وارداتوں میں اضافے کے بعد اسلام آباد پولیس نے شہریوں کو خصوصی احتیاط برتنے کی ہدایت جاری کر دی ہے۔ حکام کا کہنا ہے کہ سائبر جرائم پیشہ عناصر جعلی ایس ایم ایس اور واٹس ایپ پیغامات کے ذریعے لوگوں کو دھوکہ دے کر ان کی ذاتی اور بینکاری معلومات حاصل کرنے کی کوشش کر رہے ہیں۔

اسلام آباد پولیس کے مطابق شہری صرف سرکاری ذرائع سے موصول ہونے والے ای چالان پیغامات پر ہی اعتماد کریں۔ کسی بھی نامعلوم نمبر سے آنے والے ایس ایم ایس یا واٹس ایپ پیغام میں موجود لنک پر ہرگز کلک نہ کریں، کیونکہ یہ لنکس جعلی ویب سائٹس پر لے جا سکتے ہیں جہاں صارفین کا حساس ڈیٹا چوری کیا جا سکتا ہے۔

پولیس نے واضح کیا ہے کہ اگر کسی شہری کو مشکوک یا جعلی ای چالان کا پیغام موصول ہو تو وہ فوری طور پر اسلام آباد پولیس یا وفاقی تحقیقاتی ادارے (ایف آئی اے) کے سائبر کرائم ونگ کو اطلاع دے۔

حکام نے مزید ہدایت کی ہے کہ اپنا ای چالان صرف متعلقہ سرکاری ویب سائٹ پر جا کر ہی چیک کریں اور ادائیگی بھی صرف سرکاری پلیٹ فارم کے ذریعے کریں۔ غیر مصدقہ ویب سائٹس، نامعلوم لنکس اور مشکوک پیغامات سے ہر صورت گریز کیا جائے۔

ماہرین کے مطابق سائبر فراڈ سے بچاؤ کے لیے شہریوں کو اپنی ذاتی معلومات، بینک اکاؤنٹ کی تفصیلات، او ٹی پی (OTP) یا پاس ورڈ کسی بھی غیر متعلقہ شخص یا ویب سائٹ کے ساتھ شیئر نہیں کرنے چاہئیں۔ معمولی سی احتیاط مالی نقصان اور ڈیجیٹل فراڈ سے بچانے میں اہم کردار ادا کر سکتی ہے۔