ابھیجیت دیپکے کی شادی کیوں نہیں ہوئی؟ والدہ نے حقیقت بتا دی
ممبئی: ابھیجیت دیپکے کی شادی سے متعلق سوشل میڈیا پر گردش کرنے والی قیاس آرائیوں کے بعد ان کی والدہ انیتا دیپکے نے پہلی مرتبہ اس معاملے پر کھل کر اظہارِ خیال کیا ہے۔ ان کا کہنا ہے کہ اگرچہ ہر والدین کی خواہش ہوتی ہے کہ ان کا بیٹا شادی کر کے اپنی نئی زندگی کا آغاز کرے، لیکن اس وقت ان کی اولین ترجیح اس کی صحت، تعلیم اور روشن مستقبل ہے۔
بھارتی میڈیا رپورٹس کے مطابق انیتا دیپکے نے بتایا کہ گزشتہ تقریباً دو برس سے ان کے بیٹے کے لیے مسلسل شادی کے رشتے آ رہے ہیں۔ انہوں نے کہا کہ یہ سلسلہ اس وقت شروع ہوا تھا جب ابھیجیت دیپکے قومی سطح پر معروف شخصیت بھی نہیں تھے۔
ان کے مطابق جب بھی شادی کا موضوع زیر بحث آتا ہے تو ابھیجیت دیپکے یہی جواب دیتے ہیں کہ وہ پہلے اپنی تعلیم مکمل کرنا چاہتے ہیں اور اپنی محنت سے روزگار حاصل کرنے کے بعد ہی شادی کریں گے۔ والدہ کا کہنا تھا کہ انہوں نے بیٹے کو مالی وسائل کی فکر نہ کرنے کا مشورہ بھی دیا، لیکن وہ اپنے اصولوں پر قائم ہیں اور چاہتے ہیں کہ اپنی کمائی سے ہی ازدواجی زندگی کا آغاز کریں۔
انہوں نے مزید بتایا کہ ان کا بیٹا شادی کے موقع پر قیمتی تحائف یا مالی تعاون لینے کے بھی حق میں نہیں۔ ان کے مطابق ابھیجیت صرف سادہ انداز میں شادی کرنا چاہتے ہیں اور غیر ضروری اخراجات سے گریز کرتے ہیں۔
رپورٹ کے مطابق ابھیجیت دیپکے گزشتہ ماہ بوسٹن سے بھارت واپس آئے تھے۔ وہ نیٹ یو جی امتحان میں مبینہ بے ضابطگیوں کے خلاف ہونے والی طلبہ تحریک میں سرگرم کردار ادا کرنے کے بعد عوامی سطح پر نمایاں ہوئے اور اسی وجہ سے ان کی ذاتی زندگی بھی لوگوں کی توجہ کا مرکز بن گئی۔
انیتا دیپکے نے بتایا کہ ان دنوں ان کے بیٹے کی طبیعت مکمل طور پر ٹھیک نہیں، اس لیے گھر واپسی کے بعد بھی وہ کم از کم ایک ماہ تک شادی کا ذکر نہیں کریں گی۔ ان کا کہنا تھا کہ فی الحال وہ صرف بیٹے کی صحت یابی چاہتی ہیں، جبکہ شادی کا فیصلہ مکمل طور پر اسی کی مرضی سے ہوگا۔
انہوں نے آخر میں کہا کہ ایک ماں ہونے کے ناطے وہ بھی چاہتی ہیں کہ مناسب وقت آنے پر ان کا بیٹا اپنا گھر بسائے، لیکن اس سے پہلے اس کی صحت، تعلیم اور پیشہ ورانہ مستقبل زیادہ اہم ہے۔
