نوجوان صارفین کا آن لائن تحفظ: پی ٹی اے اور میٹا کے مابین اہم معاہدہ
اسلام آباد: پاکستان ٹیلی کمیونیکیشن اتھارٹی اور میٹا نے ملک میں نوجوانوں کے آن لائن تحفظ اور ڈیجیٹل پلیٹ فارمز کے ذمہ دارانہ استعمال کو فروغ دینے کے لیے ایک اہم تعاون پر مبنی فریم ورک کے لیٹر آف انٹینٹ پر دستخط کر دیے ہیں۔
اس شراکت داری کا بنیادی مقصد پاکستان میں ڈیجیٹل خواندگی کو بہتر بنانا اور انٹرنیٹ کے محفوظ استعمال کو یقینی بنانا ہے۔ اس معاہدے کے تحت دونوں ادارے مل کر ایسے اقدامات کریں گے جن سے آن لائن مواد کی نگرانی اور تحفظ کے معاملات میں بہتری لائی جا سکے۔
پی ٹی اے کے چیئرمین میجر جنرل (ر) حفیظ الرحمٰن نے اس موقع پر کہا کہ اس تعاون کا مرکزی ہدف بچوں اور نوجوان صارفین کے لیے ایک محفوظ اور پُر اعتماد ڈیجیٹل ماحول کی تشکیل ہے۔ یہ اقدام ذمہ دارانہ آن لائن رویوں کی حوصلہ افزائی کے لیے بھی ناگزیر ہے۔
اس معاہدے کے تحت پی ٹی اے اور میٹا استعداد کار میں اضافے کے لیے باہمی مشاورت کریں گے۔ اس کے علاوہ پالیسی مکالمے اور عوامی آگاہی مہمات کا بھی اہتمام کیا جائے گا تاکہ ڈیجیٹل فلاح و بہبود کے حوالے سے عالمی معیار کے بہترین طریقہ کار پاکستان میں متعارف کروائے جا سکیں۔
یہ تعاون پاکستان میں ریگولیٹری تقاضوں کی پاسداری کو یقینی بنانے میں بھی اہم ثابت ہوگا۔ اس کے ذریعے آن لائن مواد سے متعلق پیچیدہ امور کو حل کرنے کے لیے ایک مضبوط نظام وضع کیا جائے گا، جس سے ملکی سطح پر ڈیجیٹل تحفظ کے معیارات کو عالمی سطح کے مطابق مستحکم بنایا جا سکے گا۔
یاد رہے کہ بدلتی ہوئی ٹیکنالوجی کے دور میں نوجوانوں کو انٹرنیٹ پر درپیش خطرات سے بچانا ایک بڑا چیلنج ہے۔
آئی ٹی ایکسپرٹس کے مطابق پی ٹی اے کی جانب سے میٹا کے ساتھ یہ پیش رفت ڈیجیٹل تحفظ کے حوالے سے ایک ٹھوس قدم ہے، جو مستقبل میں پاکستان کے آن لائن ماحول کو مزید شفاف، محفوظ اور تعلیمی اعتبار سے مفید بنانے میں مدد دے گا۔
