ایشین ایم ایم اے چیمپئن شپ میں 2 طلائی تمغے پاکستان کے نام
پاکستان کے نوجوان مکسڈ مارشل آرٹس فائٹرز نے ملائیشیا میں منعقدہ گاما ایشین ایم ایم اے چیمپئن شپ میں شاندار کھیل پیش کرتے ہوئے 2 طلائی تمغے جیت لیے۔
قومی کھلاڑیوں کی کامیابی نے بین الاقوامی سطح پر پاکستان کا پرچم بلند کیا اور ایشیائی مقابلوں میں ملک کے لیے ایک اور اہم اعزاز اپنے نام کیا۔
نجی ٹی وی کے مطابق کوالالمپور میں منعقد ہونے والی اس چیمپئن شپ میں ایشیا کے 16 ممالک سے تعلق رکھنے والے 200 سے زائد ایتھلیٹس نے مختلف کیٹیگریز میں حصہ لیا۔
چیمپئن شپ کے دوران سخت مقابلوں کے باوجود پاکستانی فائٹرز محمد جواد احمد اور محمد ثاقب نے اپنے اپنے فائنلز میں کامیابی حاصل کرتے ہوئے گولڈ میڈلز جیت لیے۔
انڈر 16 کی 54 کلوگرام کیٹیگری کے فائنل میں محمد جواد احمد نے قازقستان کے مضبوط حریف ژاریلکاسینوف میرمان کا بھرپور مقابلہ کرتے ہوئے فتح حاصل کی۔ دلچسپ اور سنسنی خیز مقابلے کے بعد ان کی کامیابی نے پاکستان کو پہلا طلائی تمغہ دلا دیا۔
دوسری جانب انڈر 18 کی 56 کلوگرام کیٹیگری میں محمد ثاقب نے تھائی لینڈ کے چانگپان واچارات کو شکست دے کر ایشین چیمپئن بننے کا اعزاز حاصل کیا۔
دونوں کھلاڑیوں کی شاندار کارکردگی کو کھیلوں کے حلقوں میں سراہا جا رہا ہے، جبکہ اس کامیابی کو پاکستان میں مکسڈ مارشل آرٹس کے فروغ کے لیے بھی اہم پیش رفت قرار دیا جا رہا ہے۔
