پنشنرز کے لیے بڑی خوشخبری، مفت میں سہولت فراہم!
اسلام آباد: پنشنرز کے لیے مفت سہولت کا اہم اعلان سامنے آگیا ہے۔ نادرا نے پنشن کے اہل ریٹائرڈ ملازمین کے لیے پروف آف لائف یعنی تصدیقِ حیات کا سرٹیفکیٹ مفت فراہم کرنے کا فیصلہ کیا ہے، جس سے بزرگ پنشنرز کو اس ضروری عمل کے لیے اضافی اخراجات اور غیر ضروری دشواری سے نجات ملے گی۔
نئی سہولت کے تحت اہل پنشنرز کو ہر بار نادرا دفتر جانے کی ضرورت نہیں ہوگی۔ وہ گھر بیٹھے پاک آئی ڈی موبائل ایپ کے ذریعے بھی اپنی تصدیقِ حیات کرا سکیں گے۔
جو بزرگ خود موبائل ایپ استعمال کرنے میں دشواری محسوس کرتے ہیں، ان کے لیے بھی راستہ آسان رکھا گیا ہے۔ خاندان کا کوئی فرد مقررہ شناختی تصدیق کے مراحل مکمل کرنے کے بعد پنشنر کی جانب سے یہ عمل انجام دے سکے گا۔
نادرا کے مطابق ملک بھر میں موجود پانچ ہزار سے زائد ای سہولت فرنچائزز، 988 سے زیادہ نادرا مراکز اور 500 سے زائد یونین کونسلز کے ذریعے بھی پروف آف لائف سرٹیفکیٹ حاصل کیا جا سکے گا۔
اس اقدام سے بالخصوص ایسے بزرگ افراد کو فائدہ پہنچنے کی توقع ہے جو عمر رسیدگی یا نقل و حرکت میں دشواری کے باعث سرکاری دفاتر تک آسانی سے نہیں پہنچ سکتے۔
نادرا نے صاحبِ فراش اور کم نقل و حرکت والے افراد کے لیے موبائل سروسز کی سہولت بھی دستیاب رکھنے کا اعلان کیا ہے۔ اس طرح ضرورت مند پنشنرز کو تصدیقِ حیات کے لیے طویل سفر یا دفتر کے چکر لگانے کی مشکل سے کافی حد تک بچایا جاسکے گا۔
پنشنرز کے لیے مفت سہولت کا مقصد تصدیقِ حیات کے عمل کو آسان، قابل رسائی اور کم خرچ بنانا ہے۔ خصوصاً گھر سے باہر نکلنے میں مشکلات کا سامنا کرنے والے بزرگ افراد کے لیے پاک آئی ڈی ایپ اور موبائل سروسز اس عمل کو مزید سہل بنا سکتی ہیں۔
نادرا کی اس سہولت کے بعد پنشنرز اور ان کے اہل خانہ کے لیے ضروری ہے کہ وہ تصدیقِ حیات کے مقررہ طریقہ کار اور شناختی تصدیق کے تقاضوں کو مدنظر رکھتے ہوئے سہولت سے فائدہ اٹھائیں۔
