اسپیس ایکس کا 4 ٹن وزنی راکٹ چاند کی سطح سے ٹکرا گیا

ایلون مسک کی کمپنی اسپیس ایکس کا ایک راکٹ تقریباً 5,400 میل فی گھنٹہ کی رفتار سے چاند کی سطح سے ٹکرا گیا، جبکہ چلی میں نصب ایک طاقتور ٹیلی اسکوپ نے اس تصادم کے اثرات کے اہم شواہد محفوظ کر لیے۔

یورپین سدرن آبزرویٹری (ESO) کی ویری لارج ٹیلی اسکوپ نے 5 اگست کو ہونے والے اس تصادم کا مشاہدہ کیا۔ سائنس دانوں نے سوڈیم اور لیتھیم گیس کی نمایاں طیفی لکیروں کا سراغ لگایا، جو ٹکراؤ کے نتیجے میں چاند کی سطح سے اٹھنے والے گرد و غبار کے بادل سے پیدا ہوئیں۔

ٹیلی اسکوپ نے اس گیس کے بادل کے “کیمیائی فنگر پرنٹس” بھی ریکارڈ کیے، جو تقریباً 5 سے 10 منٹ تک برقرار رہے۔ ماہرین کے مطابق اس بادل کا پھیلاؤ درجنوں کلومیٹر تک تھا۔

سائنس دانوں کا کہنا ہے کہ اس تصادم سے حاصل ہونے والا ڈیٹا مستقبل کی خلائی تحقیق کے لیے نہایت اہم ثابت ہوگا۔ اس سے یہ سمجھنے میں بھی مدد ملے گی کہ انسانی ساختہ خلائی ملبہ چاند سے ٹکرانے کی صورت میں کس نوعیت کے اثرات مرتب کرتا ہے۔

چونکہ ناسا مستقبل میں چاند پر مستقل انسانی بیس قائم کرنے کا منصوبہ رکھتی ہے، اس لیے ایسے واقعات کا مطالعہ چاند پر خلائی ملبے کے ممکنہ خطرات اور ان کے اثرات کو بہتر طور پر سمجھنے میں اہم کردار ادا کرے گا۔