ویمنز ایشیا کپ 2026 میں پاکستان اور بھارت کا بڑا ٹاکرا
دبئی: ویمنز ایشیا کپ 2026 کے شیڈول کا باضابطہ اعلان کر دیا گیا ہے، جس کے بعد کرکٹ شائقین کی نظریں ایک بار پھر پاکستان اور بھارت کے درمیان ہونے والے سنسنی خیز مقابلے پر مرکوز ہو گئی ہیں۔ دونوں روایتی حریف ٹیمیں 5 ستمبر کو دبئی انٹرنیشنل کرکٹ اسٹیڈیم میں مدمقابل ہوں گی۔
ایشین کرکٹ کونسل (اے سی سی) کے جاری کردہ شیڈول کے مطابق ٹورنامنٹ کا آغاز 28 اگست سے ہوگا، جبکہ افتتاحی میچ میں تھائی لینڈ اور ہانگ کانگ کی ٹیمیں ایک دوسرے کے مدمقابل آئیں گی۔ ایونٹ ٹی ٹوئنٹی فارمیٹ میں کھیلا جائے گا، جس میں ایشیا کی آٹھ بہترین خواتین کرکٹ ٹیمیں شرکت کریں گی۔
ویمنز ایشیا کپ 2026 میں ٹیموں کو دو گروپس میں تقسیم کیا گیا ہے۔ گروپ اے میں پاکستان، بھارت، تھائی لینڈ، ہانگ کانگ اور چین شامل ہیں، جبکہ گروپ بی میں دفاعی چیمپئن سری لنکا، بنگلہ دیش، متحدہ عرب امارات اور انڈونیشیا کی ٹیمیں جگہ بنانے میں کامیاب ہوئی ہیں۔
گروپ مرحلے میں ہر ٹیم اپنی گروپ کی دیگر ٹیموں کے خلاف ایک، ایک میچ کھیلے گی۔ اس کے بعد دونوں گروپس کی سرفہرست دو، دو ٹیمیں سیمی فائنل کے لیے کوالیفائی کریں گی۔ پہلا سیمی فائنل 10 ستمبر جبکہ دوسرا سیمی فائنل 11 ستمبر کو کھیلا جائے گا، جبکہ ٹورنامنٹ کا فائنل 13 ستمبر کو منعقد ہوگا۔
اے سی سی کے مطابق ایونٹ کے تمام میچز دبئی میں فلڈ لائٹس کے نیچے کھیلے جائیں گے اور ہر مقابلہ مقامی وقت کے مطابق شام 6 بج کر 30 منٹ پر شروع ہوگا۔
یاد رہے کہ سری لنکا ویمنز ایشیا کپ کی دفاعی چیمپئن ہے، جبکہ بنگلہ دیش 2018 میں ٹائٹل اپنے نام کر چکا ہے۔ بھارت اب تک تین مرتبہ 2012، 2016 اور 2022 میں یہ اعزاز حاصل کر چکا ہے، جس کے باعث رواں ایڈیشن میں بھی سخت مقابلے کی توقع کی جا رہی ہے۔
