آئی سی سی چیف کا بے مقصد دوطرفہ سیریز ختم کرنے پر زور

انٹرنیشنل کرکٹ کونسل (آئی سی سی) کے چیف ایگزیکٹو سنجوگ گپتا نے ایک روزہ کرکٹ کے مستقبل پر گفتگو کرتے ہوئے کہا ہے کہ محض رسمی اور بے مقصد دو طرفہ سیریز کا سلسلہ اب ختم کیا جانا چاہیے، کیونکہ اس طرز کی کرکٹ شائقین کی توجہ حاصل کرنے اور ایک روزہ فارمیٹ کو مضبوط بنانے میں مؤثر ثابت نہیں ہورہی۔

بھارتی ذرائع ابلاغ کو دیے گئے انٹرویو میں آئی سی سی کے چیف ایگزیکٹو سنجوگ کا کہنا تھا کہ ایک روزہ کرکٹ کو دوبارہ مقبول بنانے کے لیے اسے توجہ، ثقافتی اہمیت، بھرپور مسابقت اور سخت مقابلے جیسے عناصر سے جوڑنا ہوگا۔ اس فارمیٹ کو ایسے مقابلوں کی ضرورت ہے جو شائقین میں حقیقی دلچسپی پیدا کریں اور ایک روزہ کرکٹ کی اہمیت کو برقرار رکھ سکیں۔

آئی سی سی کے چیف ایگزیکٹو نے کہا کہ ایک روزہ کرکٹ کا مستقبل مردوں اور خواتین کے عالمی کپ سے مضبوطی کے ساتھ منسلک ہونا چاہیے۔ ان کے مطابق عالمی سطح کے بڑے مقابلے اس فارمیٹ کو ایک واضح مقصد اور سمت فراہم کرسکتے ہیں، تاہم وقت کے ساتھ ساتھ ایک روزہ کرکٹ کے ڈھانچے اور دائرۂ کار میں بھی بہتری لانا ضروری ہے۔

ایک روزہ کرکٹ کو گزشتہ چند برسوں کے دوران کئی چیلنجز کا سامنا رہا ہے۔ مختصر طرز کی کرکٹ کی بڑھتی ہوئی مقبولیت اور مختلف ممالک میں ہونے والی ٹی ٹوئنٹی لیگوں نے کھلاڑیوں، شائقین اور کرکٹ بورڈز کی توجہ اس فارمیٹ کی جانب کم کی ہے۔ دوسری جانب عالمی ٹیسٹ چیمپئن شپ نے ٹیسٹ کرکٹ کو بھی ایک منظم اور واضح مسابقتی ڈھانچا فراہم کیا ہے، جس کے باعث ایک روزہ کرکٹ کے مستقبل اور حیثیت پر بحث میں مزید شدت آئی ہے۔

سابق جنوبی افریقی کپتان گریم اسمتھ اور سابق مایہ ناز کھلاڑی جَونٹی رہوڈز بھی دو طرفہ ایک روزہ سیریز کی کم ہوتی اہمیت پر تشویش کا اظہار کرچکے ہیں۔ ان کا مؤقف بھی اس بحث کو تقویت دیتا ہے کہ اگر ایک روزہ کرکٹ کو موجودہ دور میں اپنی کشش برقرار رکھنی ہے تو اس کے لیے مقابلوں کا ایسا نظام تشکیل دینا ہوگا جس میں ہر سیریز کی واضح اہمیت اور مقصد موجود ہو۔

سنجوگ گپتا کے بیان کے بعد ایک روزہ کرکٹ کے مستقبل کے حوالے سے یہ بحث ایک بار پھر نمایاں ہوگئی ہے کہ آیا دو طرفہ سیریز کی موجودہ تعداد اور ساخت اس فارمیٹ کے لیے فائدہ مند ہے یا نہیں۔ کرکٹ کے بدلتے ہوئے منظرنامے میں عالمی مقابلوں، باقاعدہ مسابقت اور شائقین کی دلچسپی کو ایک روزہ کرکٹ کی بقا کے لیے بنیادی عوامل قرار دیا جارہا ہے۔

واضح رہے کہ ایک روزہ کرکٹ کا اگلا عالمی کپ 2027 میں جنوبی افریقا، زمبابوے اور نمیبیا کی میزبانی میں کھیلا جائے گا۔ ایونٹ میں 14 ٹیمیں حصہ لیں گی، جسے ایک روزہ کرکٹ کے مستقبل کے حوالے سے اہم عالمی مقابلہ تصور کیا جارہا ہے۔