مچل اسٹارک ٹیسٹ کرکٹ میں کامیاب ترین بائیں ہاتھ کے تیز گیند باز بن گئے

آسٹریلیا کے مایہ ناز فاسٹ بولر مچل اسٹارک نے ٹیسٹ کرکٹ میں ایک اور اہم اعزاز اپنے نام کرلیا۔ ڈارون میں بنگلادیش کے خلاف سیریز کے پہلے ٹیسٹ میں ایک وکٹ حاصل کرتے ہی وہ ٹیسٹ تاریخ کے سب سے زیادہ وکٹیں لینے والے بائیں ہاتھ کے گیند باز بن گئے۔

کرکٹ سے متعلق معتبر ویب سائٹ کی رپورٹ کے مطابق مچل اسٹارک نے بنگلادیش کی اننگز کے دوران شادمان اسلام کو آؤٹ کرکے اپنے ٹیسٹ کیریئر کی 434ویں وکٹ حاصل کی، جس کے ساتھ ہی انہوں نے سری لنکا کے سابق اسپنر رنگانا ہیراتھ کو پیچھے چھوڑ دیا۔

ویب سائٹ کی رپورٹ کے مطابق رنگانا ہیراتھ نے اپنے شاندار ٹیسٹ کیریئر کے دوران 433 وکٹیں حاصل کی تھیں اور طویل عرصے تک وہ ٹیسٹ کرکٹ میں سب سے زیادہ وکٹیں لینے والے بائیں ہاتھ کے گیند باز رہے۔ تاہم مچل اسٹارک نے بنگلادیش کے خلاف میچ میں ان کا ریکارڈ توڑ کر یہ اعزاز اپنے نام کرلیا۔

مچل اسٹارک کی یہ کامیابی اس لحاظ سے بھی نمایاں ہے کہ انہوں نے بائیں ہاتھ کے تیز گیند باز کی حیثیت سے یہ سنگ میل عبور کیا، جبکہ ان سے پہلے اس فہرست میں سرفہرست رنگانا ہیراتھ اسپن گیند بازی کے ذریعے یہ مقام حاصل کرچکے تھے۔

ٹیسٹ کرکٹ میں سب سے زیادہ وکٹیں لینے والے بائیں ہاتھ کے گیند بازوں کی فہرست میں پاکستان کے عظیم فاسٹ بولر وسیم اکرم بھی نمایاں مقام رکھتے ہیں۔ وسیم اکرم نے اپنے ٹیسٹ کیریئر میں 414 وکٹیں حاصل کیں اور وہ اس فہرست میں تیسرے نمبر پر موجود ہیں۔

مچل اسٹارک نے آسٹریلوی کرکٹ میں اپنی تیز رفتار اور خطرناک گیند بازی کے ذریعے طویل عرصے سے نمایاں مقام حاصل کررکھا ہے۔ اب 434 ٹیسٹ وکٹوں کے ساتھ انہوں نے بائیں ہاتھ کے گیند بازوں میں سب سے زیادہ وکٹیں لینے کا اعزاز بھی اپنے نام کرلیا ہے۔