بلوچستان میں سیکیورٹی فورسز کا کامیاب آپریشن، فتنۃ الہندوستان کے 3 دہشت گرد ہلاک

کوئٹہ: بلوچستان کے حساس علاقوں میں جاری آپریشن ردالفتنہ 3 کے دوران سیکیورٹی فورسز نے دہشت گردوں کے خلاف بڑی کامیابی حاصل  کی ہے۔

ذرائع کے مطابق فورسز کی جانب سے کی گئی ٹارگٹڈ کارروائیوں میں فتنۃ الہندوستان کے 3 دہشت گرد ہلاک جبکہ متعدد کو شدید نقصان پہنچا ہے۔

کمبیلہ اور عاصم آباد میں سیکیورٹی فورسز نے مربوط انداز میں سرچ اینڈ سینیٹائزیشن آپریشن مکمل کیا ہے۔ اس اہم کارروائی کے نتیجے میں مجموعی طور پر 68 مربع کلومیٹر کے وسیع رقبے کو دہشت گردوں کے اثر سے مکمل طور پر کلیئر کروا لیا گیا ہے۔

آپریشن کے دوران فورسز نے ہلاک ہونے والے 3 دہشت گردوں میں سے 2 کی لاشیں قبضے میں لے لی ہیں۔ کارروائی کے دوران 4 دہشت گرد زخمی بھی ہوئے ہیں جن میں دہشت گردوں کا سرغنہ شوکت ماما بھی شامل ہے، جس سے تنظیم کو بھاری نقصان پہنچا ہے۔

سیکیورٹی فورسز نے علاقے میں موجود مشتبہ افراد کے خلاف بھی فوری ایکشن لیا ہے۔ آپریشن کے دوران مجموعی طور پر 12 مشتبہ افراد کو حراست میں لیا گیا ہے، جنہیں مزید تفتیش کے لیے نامعلوم مقام پر منتقل کر کے ان کے نیٹ ورک کے بارے میں معلومات حاصل کی جا رہی ہیں۔

فورسز نے دہشت گردوں کے ٹھکانوں اور خفیہ پناہ گاہوں کو مکمل طور پر تباہ کر دیا ہے۔ اس دوران علاقے میں نصب فتنۃ الہندوستان کے جھنڈوں کو ہٹا کر ریاست کی رٹ بحال کر دی گئی ہے، جس سے مقامی آبادی میں اطمینان کی فضا پائی جا رہی ہے۔

سیکیورٹی حکام کا کہنا ہے کہ بلوچستان میں امن و امان کے قیام تک یہ کارروائیاں جاری رہیں گی۔ فورسز نے ملک دشمن عناصر کے خاتمے کے عزم کا اعادہ کرتے ہوئے کہا کہ آپریشن ردالفتنہ 3 دہشت گردی کے مکمل صفایا ہونے تک پوری قوت سے جاری رہے گا۔

علاقے میں سیکیورٹی ہائی الرٹ ہے اور فورسز کا گشت جاری ہے۔ ملک میں دہشت گردی کے خاتمے اور قومی سلامتی کو یقینی بنانے کے لیے فورسز اپنی ذمہ داریاں انتہائی مستعدی اور جانفشانی سے نبھا رہی ہیں تاکہ بلوچستان میں امن و امان کی مستقل بحالی کو ممکن بنایا جا سکے۔