لاہور میں مکان کی تینوں چھتیں گرنے سے 10 افراد جاں بحق، ریسکیو آپریشن جاری

لاہور: باغبانپورہ کے علاقے کوٹلی پیر عبدالرحمان میں ایک خستہ حال 3 منزلہ مکان کی چھتیں گرنے سے پیش آنے والے ہولناک حادثے میں 10 افراد اپنی جانوں سے ہاتھ دھو بیٹھے۔ المناک واقعے کے بعد علاقے میں کہرام مچ گیا اور سوگ کی فضا قائم ہوگئی۔

حادثہ اس وقت پیش آیا جب گھر میں سالگرہ کی تقریب جاری تھی اور 3 خاندانوں کے افراد وہاں موجود تھے۔ ابتدائی اطلاعات کے مطابق عمارت کی چھت کو مضبوط بنانے کے لیے مٹی ڈالی گئی تھی جو بارش کے باعث بھاری ہو کر گرنے کی وجہ بنی۔

مقامی افراد نے ریسکیو کارروائیوں پر عدم اطمینان کا اظہار کرتے ہوئے کہا کہ امدادی کاموں میں سُستی برتی گئی۔ اہل محلہ نے اپنی مدد آپ کے تحت ملبے سے متعدد افراد کو زندہ نکالنے کا دعویٰ کیا، جبکہ پولیس اور ریسکیو ٹیموں کے پہنچنے سے آپریشن میں تعطل آیا۔

ریسکیو حکام نے اب تک ملبے سے 13 افراد کو نکال لیا ہے جن میں سے 10 افراد زندگی کی بازی ہار چکے ہیں۔ زخمیوں کو فوری طور پر سروسز اسپتال منتقل کیا گیا ہے جہاں طبی ماہرین ان کی جان بچانے کے لیے ہر ممکن کوششیں بروئے کار لا رہے ہیں۔

اب بھی ملبے کے نیچے دو سے زائد افراد کے دبے ہونے کا خدشہ موجود ہے۔ ضلعی انتظامیہ نے اعلان کیا ہے کہ آخری متاثرہ شخص کی بازیابی تک ریسکیو آپریشن بلا تعطل جاری رہے گا۔ بھاری مشینری کی مدد سے ملبہ ہٹانے کا کام مسلسل جاری ہے۔

وزیراعلیٰ پنجاب مریم نواز نے اس افسوسناک واقعے پر گہرے دکھ اور رنج کا اظہار کیا ہے۔ انہوں نے زخمیوں کو علاج کی بہترین سہولیات فراہم کرنے کی ہدایت کی ہے۔ ضلعی انتظامیہ نے عمارت کے گرنے کی وجوہات جاننے کے لیے باضابطہ تحقیقات کا عمل بھی شروع کر دیا ہے۔

کمشنر لاہور نے جائے وقوع کا دورہ کر کے امدادی سرگرمیوں کا جائزہ لیا۔ اس موقع پر مقامی رکن صوبائی اسمبلی نے بھی متاثرین سے اظہار تعزیت کیا اور ہر ممکن تعاون کا وعدہ کیا۔ انتظامیہ اس بات کا تعین کرے گی کہ آیا عمارت کی تعمیر میں کوئی غفلت برتی گئی تھی۔