ریاض ایئرپورٹ بند ہونے کی خبر بے بنیاد قرار، پروازیں جاری

ریاض: سوشل میڈیا اور بعض روسی میڈیا پلیٹ فارمز پر گردش کرنے والی اطلاع، جس میں ریاض کا کنگ خالد انٹرنیشنل ایئرپورٹ مکمل طور پر بند قرار دیا گیا تھا، سرکاری فضائی معلومات سے مطابقت نہیں رکھتی۔

سعودی حکام کے مطابق ایئرپورٹ معمول کے مطابق کام کر رہا ہے اور ملکی و بین الاقوامی پروازوں کی آمدورفت بلا تعطل جاری ہے۔

سرکاری ہوابازی نوٹس ٹو ایئر مشنز (نوٹم) کے مطابق صرف رن وے 15L/33R کو محدود مدت کے لیے عارضی طور پر بند کیا گیا ہے۔ اس کے علاوہ دیگر تمام رن ویز، ٹرمینلز اور فضائی آپریشنز حسب معمول فعال ہیں اور مسافروں کی آمدورفت پر کوئی عمومی پابندی عائد نہیں کی گئی۔

اب تک سعودی جنرل اتھارٹی آف سول ایوی ایشن یا ریاض ایئرپورٹس کمپنی کی جانب سے ایسا کوئی باضابطہ بیان جاری نہیں کیا گیا جس میں ایئرپورٹ کی مکمل بندش کی تصدیق کی گئی ہو۔ اسی وجہ سے سوشل میڈیا پر پھیلنے والے دعووں کو سرکاری سطح پر درست قرار نہیں دیا گیا۔

ہوابازی کے شعبے سے وابستہ ماہرین کا کہنا ہے کہ کسی ایک رن وے کو عارضی طور پر بند کرنا بین الاقوامی فضائی آپریشن کا معمول کا حصہ ہوتا ہے۔ یہ اقدام عموماً مرمت، تکنیکی معائنے یا حفاظتی اقدامات کی تکمیل کے لیے کیا جاتا ہے تاکہ فضائی سرگرمیاں محفوظ انداز میں جاری رہیں۔

ماہرین کے مطابق ایسی صورتحال میں نوٹم جاری کر کے تمام ایئرلائنز اور پائلٹس کو پیشگی آگاہ کیا جاتا ہے۔ ایک رن وے کی عارضی بندش کو پورے ایئرپورٹ کی بندش قرار دینا حقائق کے برعکس ہے، اس لیے عوام کو غیر مصدقہ خبروں پر یقین کرنے کے بجائے سرکاری ذرائع سے معلومات حاصل کرنی چاہییں۔